كيف تحافظ على جهاز المناعة د . أمير زخارى



المحافظه على جهازك المناعى :
كتب / د . أمير زخارى
بس قبل منبدأ لازم نقولكم بصفتنا اطباء :
اهتم بغسل ايدك بالصابون كويس وكذا مرة فاليوم الصابون احسن من الكحول🧼🚰

والتزم بيتك وابعد عن التجمعات ف حالة النزول للضرورة فقط.

اولا باختصار شديد لازم تعرفوا ان مفيش حاجة معينة بتزود المناعة كدا علطول لأ .. جهاز المناعة دا سيستم ومنظومة كاملة وكذا حاجة بتأثر فيه وبتعتمد كفاءته على صحة الجسم عموما.

وهنقولكم شوية نصايح مهمة اوي:

1️⃣ متاخدش مضادات حيوية💊 من دماغك ابدا الا باستشارة طبيب والمضادات الحيوية بتقتل البكتيريا مش الفيروسات 🦠وكمان بتضعف المناعة.

2️⃣ ابعد عن التوتر والضغوط والعصبية مفيش حاجة مستاهلة بجد غير انها بتضعف المناعة جدا الا انها بتسبب حدوث امراض زي الضغط و امراض القلب.

3️⃣ اهتم بالتغذية ثم التغذية ثم التغذية السليمة وهوضحها دلوقتي:

– اهتم بالبروتينات فى اكلك لانها اهم عنصر فالجسم ومن خلاله بيتم تجديد وعملية شفاء خلايا وانسجة الجسم ودا هايحافظ على جهازك المناعي.

– اهتم فى اكلك بالكاربوهيدرات المعقدة والفايبر ( الالياف ) كل انواع الخضار و( الفواكه بدون الافراط فيها طبعا ) والبطاطا والبطاطس والرز لانهم مصدر مهم للفيتامينات
والبعد عن الحلويات والسكريات لان في دراسات بتوضح ان كل مازادت نسبة السكر فالدم كل مازاد احتماليتك للعدوى باي حاجة عموما

– اهتم اوي تكون مصادر دهونك من الدهون الصحية وكمان تكون بنسب صغيرة اوي.

– ابعد عن المقالي والزيوت والسمن الكتير حافظ على صحة قلبك.

4️⃣ الاهتمام بالرياضة ولو نص ساعة يوميا ف بيتك ☑️

ايه فوايد الرياضه :
– الرياضة بتساعد على طرد الميكروبات والبكتيريا من الرئة ودا بيقلل احتماليتك انك تتصاب بالانفلونزا او البرد وامراض تانية ☑️

– الرياضة بتساعد على إرتفاع درجة حرارة الجسم اثناء وبعد التمرين ودا بيساعد على وقف نمو الميكروبات جوه الجسم وتضاعفها وبيوفر الارتفاع دا بيئة كويسة للجسم انه يحاربها☑️

– الرياضة بتقلل التوتر جدا وبالتالي بتقلل افراز بعض الهرمونات اللي بتطلع اثناء التوتر اللي بتساعد على احتمالية اصابتك بالعدوى☑️

5️⃣ النوم الكويس والراحة ( النوم دا اهم مرحلة ف يومك لان فيه بيحصل كل حاجة من عملية استشفاء لنمو وتجديد الخلايا فحافظ على انك تاخد وقت كفاية للنوم.

6️⃣ اذا كان عندك المقدرة تاخد multivitamins ( فيتامينات ) خدهم لانهم مهمين اوي فالحفاظ على وظايف الجسم الحيوية
وفيتامين سي بيحسن سرعة واستجابة جهاز المناعة لكن لوحده ميعملش اي حاجة ف ظل انك مهمل كل النصايح اللي فوق دي مش سحر هو

7️⃣ واهم نصيحة هنا وهي شرب سوايل كفاية الماء ثم الماء ثم الماء عالاقل ٢-٣ لتر يوميا اشرب سوايل كفاية بنكررها اهو والناس اللي مبتحبش تشرب المية عشان طعمها حط عليها قطع تفاح او شرايح ليمون او برتقان هيغير طعمها شوية وهيبقى اجمل.

8️⃣ ابعد عن التدخين 🚬❌🚫صدقني هتحتاج الرئة بتاعتك ف يوم من الايام وهتقول يارتني
حافظ على صحتك انت بتضر نفسك جدا وبتضر اللي حواليك لو كانت اسرة كلنا مسؤولين.

⚠️ كل النصايح دي مع بعض هتساعدك تحافظ على اجهزة جسمك وجسمك يكون بصحة كويسة
ولو جسمك بخير جهازك المناعي هيكون دايما بخير وطبعا ربنا هو الشافي واللي بيستر دايما بس لازم الاخذ بالاسباب .

الرابط المخصتر للمقال:

تابعنا على تويتر والفيسبوك واليوتيوب ليصلك كل ما هو جديد

صفحتنا على الفيسبوك |صفحتنا على تويتر
تنوية هام: الموقع غير مسئول عن صحة ومصداقية الخبر يتم نشره نقلاً عن مصادر صحفية أخرى، ومن ثم لا يتحمل أي مسئولية قانونية أو أدبية  وإنما يتحملها المصدر الرئيسى للخبر. والموقع يقوم فقط بنقل ما يتم تداولة فى الأوساط الإعلامية المصرية والعالمية لتقديم خدمة إخبارية متكامله. 
زر الذهاب إلى الأعلى
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock