يا شط بعيد
رموك في البحر وأمواجه
بتضرب في سنين عمرك
وكل موجه ورا موجه
بتقسي أكتر وبتشدك
لعمق البحر ورياحه
وكل موجه بتعدي
جايه بسرعه تندهلك
وباصص للسما العاليه
تدعي الشط يظهرلك
وموج البحر يقسي عليك
وبتحاول عشان توصل
لا الشط باين له مكان
وحاش الموج مجاديفك
وقلبك نبضه بقي تعبان
وغاب الفجر عن عينك
وبتحاول كتير مرات
يجوز تقرب المسافات
تلاقي البعد طال اكتر
وابعاد الوصول تزداد
وبتحاول في قلب البحر
عشان توصل في يوم للشط
لا عارف يوم تكون بحار
ولا قادر تعوم أمتار
وتسمع صوت انين الناي
وناسي شكل بكره الجاي
ياعازف كل احزاني
وخبيت الفرح تاني
وبتداري ساعات الفرح
وبتطول سنين الجرح
يا حلم تاه وتوهني
في وسط البحر وسايبني
ولسه البحر امواجه
بتضرب موجه والتانيه
وكل موجه بتشوفها
مختلفه في أشكالها
ساعات دوامه ورياحها
يودي لحياة تانيه
تابعنا على تويتر والفيسبوك واليوتيوب ليصلك كل ما هو جديد
